ÜBER UNS

Tabea Blumenthal

Mis liebschte Hobby isch mit mine drü Kids (Jg. 2002, 2013, 2014) dur dä Wald und d’Berge z’streife. Nachher fühled sich alli entspannt, zfride und voller Energie.

Dä Chind die magische Momänt wo mer i de Natur chan erläbe, dörfe z’Zeige, isch dä Grund warum ich so gärn innere Waldspielgruppe schaffe. Bi dä Waldchind St. Galle han ich d’Usbildig zur Waldspielgruppe Leiterin abgschlosse.

Leiterin am Mittwuchmorge.

Yvonne Süss

Am liebschte bini verusse, laa mir d’Sunne is Gsicht schiine, fange Rägetropfe mit de Zunge uf und laa mir vom Wind d’ Frisur verwuschle. Ich tue au gern choche, werchle und ha froid a Märli us de ganze Welt. Mit minere Familie (d’Chind händ Jg. 2009, 2011, 2013) und Geisse wohni im Grüt. Ich schaffe au no als Arztghilfin und han mi bi de Waldchind St. Galle als Naturpädagogin usbilde la.

De Wald hani so gern, wili nach Luscht und Luune chan si, wini grad wet; ich chan mi bim Sport ustoobe und aber au ide Rueh de Gedanke naahange.

Leiterin am Mittwuch- und Dunschtigmorge.

JUDITH KAUFMANN

Au ich mach am liebschte alles veruss. Esse, dänke, schlafe, spiele, bewege, lose, stuune und uustobe. Im Wald und ide Berge fühli mi richtig dehei und am allerwöhlschte. Ich wohne mit minere Familie, dChind die Jhrg. 2013, 2014, 2018, im Grüt und schaffe als freibrueflichi Hebamme ide Region. 

Mis Herz schlaht für Füür, Blätterhüüfe, grüble die Erde, Zwergewelte, Baumgschichte, Schlammrutschbahne, für Waldkunscht jeder Art, und für alli chiine Wunder und Schönheite verusse, womer nöd xeht wämmer z`schnell verbii lauft.  

Ich freu mi wiiterhin bi de Ambitzgis dörfe iiz springe und unterstütze.

PASCALE SIGRIST

I liebs mini Ziit verusse z’verbringe, wänn immer möglich. Dä Vögel z’lusche, d’ Wulche beobachte, d’Ameisli studiere und au bim schlächtem Wätter Abentür erläbe. Ich freu mi sehr ab Märli und Gschichte und werkle sehr gern umenand. Ich wohne in Auslike und bewege mich vill um und am See im Ried. Ich gnüsses, d’Veränderige vode Jahresziite wahrznäh und stuune immer wieder über die zauberhafti Natur. Näbed de Waldspielgruppe schaffi no als Bürofrau. I wird d’Usbildig bi de Waldchind St. Galle als Naturpädagogin mache.

I freu mi mit de Chind all die wundersame Wese, Pflanze und Zügs im Wald z’entdecke und em Wind und Wätter wänn nötig z’trotze.

Leiterin am Dunschtigmorge